స్టీల్ ప్లేట్లు, గ్లాసులతో పర్యావరణ హిత చర్యలు చేపట్టిన జిల్లా పరిపాలన

NANDYAL May18 :- నంద్యాల జిల్లాను “ప్లాస్టిక్ రహిత జిల్లా”గా తీర్చిదిద్దడంలో ప్రజాలందరూ భాగస్వాములు కావాలని జిల్లా కలెక్టర్ జి. రాజకుమారి పిలుపునిచ్చారు. సోమవారం కలెక్టరేట్‌లో నిర్వహించే “ప్రజా సమస్యల పరిష్కార వేదిక (గ్రీవెన్స్ డే)”కు హాజరయ్యే ప్రజల కోసం “ప్లాస్టిక్ రహిత” లంచ్ కార్యక్రమాన్ని కలెక్టర్ ప్రారంభించారు.

ఈ సందర్భంగా జిల్లా కలెక్టర్ మాట్లాడుతూ, పర్యావరణ పరిరక్షణకు ప్రాధాన్యతనిస్తూ సింగిల్ యూజ్ ప్లాస్టిక్ నిర్మూలన దిశగా నంద్యాల జిల్లా పరిపాలన పలు చర్యలు చేపడుతోందన్నారు. “ప్లాస్టిక్ రహిత నంద్యాల” లక్ష్య సాధనలో జిల్లా ప్రజలందరూ భాగస్వాములు కావాలని కోరారు. ఇందులో భాగంగానే ప్రతి సోమవారం నిర్వహించే ప్రజా సమస్యల పరిష్కార వేదికకు జిల్లాలోని వివిధ ప్రాంతాల నుంచి సుమారు 400 నుండి 450 మంది ప్రజలు తమ సమస్యలను వినిపించేందుకు కలెక్టరేట్‌కు వస్తున్నారని తెలిపారు.

ఎండ, వానలను సైతం లెక్కచేయకుండా వచ్చే ప్రజలకు ఎటువంటి అసౌకర్యం కలగకుండా ప్రత్యేక రిసెప్షన్ ఏర్పాటు చేయడంతో పాటు, వారి సమస్యలను శ్రద్ధగా స్వీకరించి సంబంధిత అధికారులకు పంపిస్తున్నామని చెప్పారు. అదేవిధంగా ప్రజలకు మధ్యాహ్న భోజన సదుపాయాన్ని కూడా కల్పిస్తున్నామని, ఈ కార్యక్రమానికి రెడ్ క్రాస్ సొసైటీ, కాశీనాయన ఆశ్రమం మరియు నంద్యాల మున్సిపాలిటీ సంయుక్తంగా సహకరిస్తున్నాయని వివరించారు.

ప్రతి సోమవారం సుమారు 450 మందికి భోజనాలు అందిస్తున్నట్లు కలెక్టర్ తెలిపారు. ఇప్పటి వరకు విస్తరాకులపై సన్నని ప్లాస్టిక్ పొర ఉన్న పాత్రల్లో భోజనం వడ్డించేవారని, అయితే పర్యావరణ హిత చర్యల్లో భాగంగా ఇకపై సింగిల్ యూజ్ ప్లాస్టిక్‌ను పూర్తిగా నివారించాలనే లక్ష్యంతో మున్సిపాలిటీ సహకారంతో 400 స్టీల్ ప్లేట్లు, 400 స్టీల్ గ్లాసులను వినియోగంలోకి తీసుకువచ్చినట్లు కలెక్టర్ వెల్లడించారు.

ఇదే సమయంలో సాధారణ ప్రజల అవసరాలను దృష్టిలో ఉంచుకుని మున్సిపాలిటీ పరిధిలో “స్టీల్ ప్లేట్స్ & స్టీల్ గ్లాసెస్ బ్యాంక్” ఏర్పాటు చేసినట్లు కలెక్టర్ తెలిపారు. వివాహాలు, శుభకార్యాలు, సామూహిక కార్యక్రమాల కోసం ప్రజలు నామమాత్రపు అద్దె చెల్లించి ఈ స్టీల్ పాత్రలను వినియోగించుకోవచ్చన్నారు. ఫంక్షన్ హాళ్ల నిర్వాహకులు, సామాజిక సంస్థలు, ప్రజలందరూ ప్లాస్టిక్ వినియోగాన్ని తగ్గించి స్టీల్ పాత్రల వినియోగాన్ని ప్రోత్సహించాలని, నంద్యాల జిల్లాను “ప్లాస్టిక్ రహిత జిల్లా”గా తీర్చిదిద్దడంలో భాగస్వాములు కావాలని జిల్లా కలెక్టర్ విజ్ఞప్తి చేశారు.