భారత హాకీ చరిత్ర- ధ్యాన్ చంద్ జీవితం పై వక్తృత్వ పోటీలు

భారత హాకీ శతాబ్ది ఉత్సవాలు పురస్కరించుకొని నంద్యాల హాకీ సంఘం ఆధ్వర్యంలో నంద్యాల లయన్స్ క్లబ్ సహకారంతో గురువారం రామకృష్ణ డిగ్రీ కళాశాల వివేకానంద ఆడిటోరియంలో “భారత హాకీ చరిత్ర – ధ్యాన్ చంద్ జీవితం” అంశంపై ఆంగ్లంలో వక్తృత్వ పోటీలు నిర్వహించారు. పోటీలకు న్యాయ నిర్ణేతలుగా విశ్రాంత ఆంగ్ల ప్రొఫెసర్ ఐ. విజయభాస్కర రెడ్డి, డాక్టర్ రవి కృష్ణ వ్యవహరించారు.

ఈ సందర్భంగా హాకీ ఆంధ్రప్రదేశ్ సంఘం అధ్యక్షులు చాణక్య రాజు,ఉమ్మడి కర్నూలు జిల్లా మాజీ ఒలింపిక్ చైర్మన్ డాక్టర్ రవి కృష్ణ మాట్లాడుతూ నంద్యాల హాకీ సంఘం ఆధ్వర్యంలో ఏడవ తేదీ ఎస్పీజీ మైదానంలో ఉదయం జరిగే హాకీ శతాబ్ది ఉత్సవాలలో వ్యాసరచన,వక్తృత్వ పోటీల బహుమతులు అందజేస్తామన్నారు.

దేశ వ్యాప్తంగా శతాబ్ది ఉత్సవాలు పురస్కరించుకుని 1000 హాకీ మ్యాచులు హాకీ ఇండియా ఆధ్వర్యంలో నిర్వహిస్తున్నారని,నంద్యాలలో కూడా హాకీ మ్యాచ్ నిర్వహిస్తున్నామన్నారు.హాకీ క్రీడాకారులను సత్కరించడం జరుగుతుందన్నారు.

ఈ కార్యక్రమంలో నంద్యాల లయన్స్ క్లబ్ అధ్యక్షులు సోమేసుల నాగరాజు,కోశాధికారి అమిదేల జనార్ధన్,నంద్యాల హాకీ సంఘం ఉపాధ్యక్షులు స్టీఫెన్, కళారాధన కార్యనిర్వాహక కార్యదర్శి పత్తి రంగనాథ్ పాల్గొన్నారు.

వక్తృత్వ పోటీ విజేతలు

గుడ్ షెఫర్డ్ ఇంగ్లీష్ మీడియం స్కూల్ కు చెందిన అల్ సుమయ,ముస్కాన్ జవేరియా,మేఘన ప్రథమ,ద్వితీయ,తృతీయ స్థానాలు సాధించగా,జయ ప్రకాష్ రాజ్, ఆఫ్రిన్ స్పెషల్ జ్యూరీ బహుమతులకు ఎంపికయ్యారు.