నంద్యాలలో జిల్లా స్థాయి ఓపెన్ చెస్ టోర్నమెంట్ ప్రారంభం

NANDYAL April 24 :- నంద్యాల జిల్లా చెస్ సంఘం ఆధ్వర్యంలో శుక్రవారం ఎన్జీవోస్ కాలనీ లో ఉన్న సత్య సాయి ఇంగ్లీష్ మీడియం లో 13 సంవత్సరాలలోపు బాల బాలికలకు వేరువేరుగా జిల్లా స్థాయి ఓపెన్ చెస్ టోర్నమెంట్ పోటీలు ప్రారంభమయ్యాయి.ఈ సందర్భంగా జిల్లా చెస్ సంఘం ప్రధాన కార్యదర్శి రామసుబ్బారెడ్డి నిర్వహణలో జరిగిన ప్రారంభోత్సవం కార్యక్రమంలో నంద్యాల జిల్లా చెస్ సంఘం అధ్యక్షులు డాక్టర్ రవికృష్ణ రిబ్బన్ కత్తిరించి టోర్నమెంట్ ను లాంచనంగా ప్రారంభించారు.

డాక్టర్ రవి కృష్ణ మాట్లాడుతూ చదరంగం క్రీడ ఏకాగ్రతను ఇనుముడింప చేస్తుందని తద్వారా చదువులో కూడా రాణించడానికి అవకాశాలు అధికమవుతాయని అన్నారు. మొబైల్ ఫోన్ పిల్లలలో దుష్ప్రభావం చూపుతున్నదని,దాని నుంచి పిల్లల దృష్టి క్రీడలపై ఉండేలా చేస్తే పిల్లలలో మేధో వికాసం జరుగుతుందన్నారు.

విద్యార్థులు చదువుతోపాటు క్రీడలు, కళలలో పాల్గొనడం వలన వారి వ్యక్తిత్వ వికాసానికి దోహదం చేస్తాయని,క్రమశిక్షణ కూడా అలవడుతుందని అన్నారు. గెలుపు ఓటములను స్వీకరించే మనస్తత్వం అలబడుతుందని , తద్వారా చిన్న విషయాలకు కృంగి పోకుండా ఉండడానికి క్రీడలు తోడ్పడతాయని అన్నారు. క్రీడలలో క్రమం తప్పని నిరంతర సాధన విజయానికి సోపానం అన్నారు.

నంద్యాల జిల్లా చెస్ సంఘం కార్యదర్శి రామ సుబ్బారెడ్డి మాట్లాడుతూ ఈరోజు జరిగే పోటీలలో విజేతలుగా నిలిచిన వారు మార్కాపురం జరగనున్న రాష్ట్రస్థాయి చెస్ పోటీలలో జిల్లా తరఫున పాల్గొంటారని తెలిపారు. ఆంధ్ర చెస్ అసోసియేషన్ రాష్ట్రస్థాయి టోర్నమెంట్ తేదీలను ప్రకటించిందని, తదనుగుణంగా జిల్లా జట్టు ఎంపిక కోసం జిల్లా స్థాయి టోర్నమెంట్లు నిర్వహిస్తున్నామని తెలిపారు.

ఈ కార్యక్రమంలో సత్య సాయి ఇంగ్లీష్ మీడియం స్కూల్ కరస్పాండెంట్ రామిరెడ్డి, మేనేజింగ్ డైరెక్టర్ మణికంఠ రెడ్డి,నంద్యాల జిల్లా చెస్ సంఘం కార్యదర్శి రామ సుబ్బారెడ్డి, టోర్నమెంట్ ఆర్బిటర్ సుజాత,150 మంది క్రీడాకారులు,వారి తల్లిదండ్రులు, చెస్ కోచ్ లు పాల్గొన్నారు.